Policia e Tiranës ka goditur një skemë të organizuar për shpërndarjen e kartëmonedhave të falsifikuara, duke sekuestruar 11 pako me euro të dyshuara të falsifikuara dhe arrestuar katër persona. Operacioni, i koduar “Wrong Delivery”, u drejtua nga Seksioni për Hetimin e Krimit Ekonomik e Financiar, nën mbikëqyrjen e Prokurorisë së Tiranës.

Në pranga ranë Alesio Brungaj, 19 vjeç, nga Shkodra, i cili dyshohet se kishte porositur shumën e falsifikuar, Serxhio Lala, 26 vjeç, Enis Aliaj, 19 vjeç, si dhe një i mitur 17-vjeç. Një tjetër person, A. P., 19 vjeç, nga Kruja, është shpallur në kërkim.

Hetimet zbuluan se kartëmonedhat shpërndaheshin edhe përmes rrjetit social TikTok dhe përdoroheshin persona të rinj për të fshehur origjinën e parave. Sipas policisë, shuma e falsifikuar ishte 18 mijë euro, në prerje të ndryshme, e cila do të hidhej në qarkullim në Shkodër dhe Mal të Zi.

Policia po vijon hetimet për kapjen e të gjithë personave të përfshirë në këtë veprimtari kriminale dhe për dokumentimin e plotë të skemës. Materialet procedurale janë referuar Prokurorisë së Tiranës për veprime të mëtejshme.