Kryeministri i Izraelit, Benjamin Netanyahu, u zotua të dielën se Izraeli do të bëjë “gjithçka që është e nevojshme” për të parandaluar rikthimin e aftësive kërcënuese të Hezbollahut në Liban dhe Hamasit në Rripin e Gazës.

Gjatë javës së fundit, ushtria izraelite ka goditur disa shënjestra në Libanin fqinj, duke përfshirë raketahedhës dhe baza ushtarake të Hezbollahut. Ndërkohë, sulmet ajrore në Gaza të shtunën shkaktuan vdekjen e 21 personave dhe plagosjen e dhjetëra të tjerëve, sipas agjencisë së mbrojtjes civile në këtë rajon.

“Ne po vazhdojmë ta godasim terrorizmin në disa fronte,” tha Netanyahu gjatë mbledhjes së kabinetit të tij. Ai theksoi se Hamasi ka shkelur vazhdimisht armëpushimin e brishtë të ndërmjetësuar nga SHBA më 10 tetor, dhe se Izraeli ka reaguar duke goditur objektivat terroriste në Rripin e Gazës.

Ushtria izraelite deklaroi se një “terrorist i armatosur” kishte kaluar vijën e verdhë të Gazës dhe kishte hapur zjarr ndaj forcave izraelite, gjë që çoi në sulmet ajrore si kundërpërgjigje. Netanyahu theksoi se Izraeli vepron në mënyrë të pavarur për sigurinë e vet, pa kërkuar miratim të jashtëm.

Sipas ushtrisë dhe agjencisë Shin Bet, sulmet në Gaza “eliminuan kreun e furnizimit dhe pajisjeve në qendrën e prodhimit të Hamasit”, duke goditur infrastrukturën dhe komandantët e organizatës.

Ky zhvillim vjen pas dy vjetësh konflikti dhe ndërmjetësimit të SHBA-së për arritjen e armëpushimit, i cili tashmë po vihet në provë nga sulmet e fundit në të dyja anët.