Operacioni policor “Stolen Line” vijon me ritme të shpejta në Tiranë, ku gjatë kontrolleve të fundit janë sekuestruar dy automjete të tjera luksoze, një Audi A6 dhe një Audi A5, me vlerë të përbashkët rreth 105 000 euro.

Vetëm një ditë më parë, në kuadër të të njëjtit operacion, u sekuestruan dy automjete të tjera me vlerë 110 000 euro, të gjitha të vjedhura në vende të ndryshme të Europës dhe të destinuara për shitje në Shqipëri.

Sipas njoftimit të Policisë së Tiranës, në këtë aktivitet kriminal janë përfshirë dy persona që tashmë janë shpallur në kërkim:
• V. M(L)., i dyshuar për trafikimin e një Audi A6 të vjedhur në Gjermani;
• J. C., i dyshuar për trafikimin e një Audi A5 të vjedhur në Bullgari.

Të dy automjetet, modele të viteve të fundit, janë sekuestruar si prova materiale, ndërsa hetimet për zbardhjen e plotë të rrjetit të trafikut vijojnë.

Policia njofton se operacioni “Stolen Line” do të vazhdojë deri në goditjen e plotë të grupit të strukturuar që merret me futjen në Shqipëri të makinave të vjedhura në vendet e BE-së.

Materialet janë referuar në Prokurori për veprime të mëtejshme.