Një ngjarje e rëndë ka tronditur Menidin, në perëndim të Athinës, ku një vajzë 14-vjeçare raportoi se kishte pësuar një abort spontan pas një sulmi të dyshuar nga nëna e saj, 35 vjeç.

Sipas autoriteteve greke, e mitura u paraqit në komisariat duke mbajtur me vete fetusin e pajetë, dhe menjëherë pas denoncimit, policia arrestoi nënën nën akuzat për dhunë në familje dhe shkaktim të dëmtimeve të rënda trupore.

Vajza ndodhet aktualisht në Spitalin e Fëmijëve “Paidon”, ku po merr trajtim mjekësor dhe mbështetje psikologjike. Hetimet për ngjarjen vijojnë, ndërsa autoritetet po mbledhin prova dhe dëshmi për të sqaruar plotësisht rrethanat e incidentit.

Ky rast ka tronditur komunitetin lokal dhe ngre shqetësime për sigurinë dhe mbrojtjen e të miturve nga dhuna në familje.