Policia e Tiranës, në bashkëpunim me Prokurorinë e Tiranës, ka sekuestruar pasuri me vlerë rreth 200 mijë euro, në pronësi të dy personave të dënuar për trafikim të lëndëve narkotike në Shqipëri dhe Itali.

Sipas njoftimit zyrtar, pasuritë i përkasin:
• Pajtim Braçaj, 63 vjeç, i dënuar në Shqipëri për trafikim të lëndëve narkotike;
• Gjino Lleshaj, alias Shkëlqim Lleshaj, 44 vjeç, i dënuar në Itali për të njëjtën vepër penale.

Me vendim të Gjykatës së Tiranës, është vendosur sekuestro preventive mbi:
• 1 apartament në zonën e Selitës;
• 1 garazh në Selitë të Vogël,

me një vlerë totale prej rreth 200 000 euro.

Operacioni i koduar “Burimi” u finalizua nga Seksioni për Hetimin e Pastrimit të Parave dhe Aseteve Kriminale, si pjesë e hetimeve për gjurmimin dhe konfiskimin e pasurive që dyshohet se rrjedhin nga veprimtari kriminale, brenda dhe jashtë vendit.

Policia bën me dije se hetimet vijojnë për identifikimin dhe sekuestrimin e aseteve të tjera me burim kriminal, në pronësi të këtyre shtetasve apo personave të lidhur me ta.