Një operacion i koduar “Crossline”, i zhvilluar nga Seksioni për Hetimin e Trafiqeve të Paligjshme në Tiranë, ka çuar në arrestimin e një 20-vjeçari shqiptar, i akuzuar për shfrytëzim prostitucioni në bashkëpunim me një shtetas kolumbian ende të paidentifikuar.

Sipas informacioneve zyrtare të policisë, i riu me iniciale K. P., banues në Tiranë, dyshohet se ishte pjesë e një skeme trafiku ndërkombëtar, përmes së cilës shtetase të huaja, kryesisht nga Kolumbia, silleshin në Shqipëri për t’u shfrytëzuar për prostitucion.

Gjatë operacionit u kapën në flagrancë 7 gra, të moshës 27 deri në 35 vjeç (6 kolumbiane dhe 1 nga Panamaja), në një apartament me qira ditore në rrugën “Gjon Muzaka” në kryeqytet, ku dyshohet se ushtronin aktivitetin e paligjshëm.

Policia ka nisur procedimin penal ndaj shtetaseve të huaja, ndërkohë që vijojnë hetimet për identifikimin dhe kapjen e bashkëpunëtorit kolumbian që dyshohet të jetë një nga organizatorët kryesorë të këtij rrjeti.

Operacioni është zhvilluar në bashkëpunim të ngushtë me Prokurorinë e Tiranës, përmes metodave speciale të hetimit, duke dokumentuar një veprimtari kriminale të strukturuar që synonte përfitime përmes shfrytëzimit të viktimave të trafikimit.

Materialet janë referuar në Prokurori, ndërsa autoritetet njoftojnë se hetimet po vijojnë në disa pista, për të zbardhur të gjithë rrjetin dhe për të identifikuar persona të tjerë të përfshirë në këtë veprimtari.