Tiri Gjoci dhe Krisa Çaushi, ish-banorë të edicionit të katërt të “Big Brother VIP Albania”, ishin së fundmi të ftuar në emisionin “Nata me Aulonën”, ku ndanë reflektimet e tyre mbi eksperiencën në shtëpinë më të famshme në Shqipëri dhe fenomenin e lidhjes së fortë emocionale të fansave me këtë reality-show.

Gjatë bisedës, Krisa theksoi se publiku shpesh përfshihet emocionalisht në një format që ka natyrë të përkohshme dhe që përfundon, ndërsa jetët e banorëve vazhdojnë në rrjedhën e tyre normale.

“Mos u përfshini kaq shumë emocionalisht në një reality kur ai do të mbarojë. Secili vazhdon jetën e tij. Disa mund të pajtohen, disa jo, dhe kjo është normale, nisur nga debatet apo situatat që ndodhin brenda shtëpisë,” tha Krisa, duke theksuar se përplasjet dhe afeksionet e krijuara në “Big Brother” nuk duhet të ndikojnë tej mase në ndjenjat e publikut.

Nga ana tjetër, këngëtari Tiri Gjoci u ndal në një aspekt psikologjik të sjelljes së fansave, duke e cilësuar atë një fenomen për t’u studiuar.

“Mendoj që rasti i fansave të Big Brother është rast për t’u studiuar. Është shumë e çuditshme se si arrijnë të krijojnë një lidhje emocionale me disa banorë, përtej çdo logjike. Edhe kur faktet janë të qarta, ata nuk i pranojnë. Kjo është një sjellje vërtet interesante për analizim,” theksoi Tiri.

Të dy artistët ndanë qëndrime të ngjashme mbi ndikimin emocional të reality show-t në publik, duke apeluar për më shumë distancë dhe kuptim të karakterit argëtues të formatit.