Kanadezët po votojnë sot në zgjedhjet e parakohshme, ku liberalët në pushtet të kryeministrit Mark Carney përballen me sfidën e konservatorëve të opozitës të udhëhequr nga Pierre Poilievre.

Ndërkohë, presidenti amerikan Donald Trump ndezi edhe më tej atmosferën elektorale, duke përsëritur thirrjet e tij që Kanadaja të bëhet “Shteti i 51-të i çmuar i Shteteve të Bashkuara”, një propozim që është refuzuar prerazi nga politikanët kanadezë dhe nga shumica dërrmuese e votuesve.

Tarifat e vendosura nga Trump kundër Kanadasë dhe retorika e tij për aneksim kanë shkaktuar zemërim në Otava, duke u interpretuar si një akt bullizmi ndaj një aleati tradicional dhe fqinji të afërt.

Mark Carney, ish-guvernator i Bankës së Anglisë dhe Bankës së Kanadasë, është shfaqur si figura stabilizuese që premton diversifikimin e marrëdhënieve tregtare të vendit me Evropën dhe Azinë, në përpjekje për të reduktuar varësinë nga Shtetet e Bashkuara. Poilievre, ndërkohë, ka bërë fushatë mbi një platformë të djathtë, duke premtuar uljen e taksave dhe shkurtimin e shpenzimeve qeveritare.

Megjithëse konservatorët hynë në garë me një avantazh të ndjeshëm, ndërhyrjet e Trump kanë tronditur dinamikën elektorale. Retorika populiste e Poilievre, ngjashme me stilin e Trump, ka shqetësuar një pjesë të elektoratit kanadez, veçanërisht mes tensioneve në rritje me Uashingtonin.

Në një postim në platformën e tij “Truth Social”, Trump shkroi:

“Shikoni sa e bukur do të ishte kjo masë tokësore. Qasje e lirë PA KUFI. Amerika nuk mund ta subvencionojë më Kanadanë me qindra miliarda dollarë në vit që kemi shpenzuar në të kaluarën. Nuk ka kuptim nëse Kanadaja nuk është një Shtet.”

Ai bëri thirrje që kanadezët të zgjidhnin “njeriun me forcën dhe mençurinë” për të përgjysmuar taksat dhe për të rritur fuqinë ushtarake – një mesazh që u prit me skepticizëm në veri të kufirit.

Në këtë sfond të tensionuar, mbi 29 milionë kanadezë janë thirrur të zgjedhin 343 anëtarët e Dhomës së Komunave në Otava. Sipas autoriteteve të zgjedhjeve, më shumë se 7 milionë qytetarë kanë votuar paraprakisht – një rekord historik.

Sondazhet e fundit favorizojnë lehtë Liberalët e Carney, megjithëse gara mbetet e ngushtë. Rezultatet e para priten të shpallen menjëherë pas mbylljes së qendrave të votimit këtë mbrëmje.