Tiranë – Një ngjarje e rëndë ka tronditur mbrëmjen e djeshme zonën e Kodrës së Priftit, ku një konflikt mes babë e bir ka përfunduar me vrasje.

Sipas Policisë, rreth orës 18:50, në banesën e tij në rrugën “Ilia Shyti”, 74-vjeçari Hekuran Gjoni ka goditur me thikë djalin e tij, Asim Gjoni, 37 vjeç. I riu u dërgua me urgjencë në spital, por fatkeqësisht nuk mundi t’u mbijetonte plagëve të marra.

Paraprakisht, dyshohet se konflikti mes tyre ka nisur në gjendje të dehur, fillimisht me debat verbal dhe më pas ka degjeneruar në dhunë fizike. Në kulmin e përplasjes, i moshuari ka marrë një thikë dhe ka qëlluar për vdekje të birin.

Menjëherë pas ngjarjes, Policia ka shoqëruar autorin në komisariat, ndërsa si provë materiale është sekuestruar arma e krimit. 74-vjeçari tashmë akuzohet për veprën penale “Vrasje për shkak të marrëdhënieve familjare” dhe pritet të dalë para drejtësisë.

Hetimet për zbardhjen e plotë të rrethanave të tragjedisë vijojnë.