Një 30-vjeçar shqiptar, i identifikuar si Sajmir Beca, ka humbur tragjikisht jetën në Northampton të Anglisë, pasi u shtyp nga një kamion mbeturinash. Sipas The Sun, i riu po flinte brenda një koshi plehrash në momentin kur ndodhi aksidenti fatal.

Ngjarja e rëndë u regjistrua më 31 tetor në Rrugën Wellington, ku fqinjët thanë se u zgjuan nga britmat e forta në orët e para të mëngjesit. Shërbimet e urgjencës mbërritën menjëherë dhe e transportuan Sajmirin drejt Spitalit të Coventry-t, por pavarësisht përpjekjeve të mjekëve, ai nuk mundi t’u mbijetonte plagëve dhe ndërroi jetë më 6 nëntor.

Miqtë e tij thanë se Sajmiri kishte kërkuar më herët strehë tek persona të ndryshëm, por pasi nuk gjeti një vend mbështetës, përfundoi duke fjetur në rrugë. Autoritetet britanike vijojnë hetimet për të zbardhur plotësisht rrethanat e ngjarjes.