Një ngjarje e rëndë ka ndodhur paraditen e sotme në plazhin e Qerretit, në Kavajë, ku një pushues 73-vjeçar ka humbur jetën pasi dyshohet se ka pësuar arrest kardiak gjatë kohës që po hynte në det.

Ngjarja ndodhi rreth orës 10:00 të mëngjesit, kur shtetasi H. U., banues në Kavajë, u pa nga pushuesit dhe shërbimi i plazhit në gjendje të rënduar shëndetësore.

Pavarësisht përpjekjeve për ta ndihmuar, ai nuk arriti të mbijetonte, ndërsa shkaqet e vdekjes po hetohen nga autoritetet.

Policia konfirmoi ngjarjen në një njoftim zyrtar:

“Rreth orës 10:00, në Qerret të Kavajës, dyshohet se ka pësuar arrest kardiak kur është futur në det dhe për pasojë ka humbur jetën, shtetasi H. U., 73 vjeç, banues në Kavajë.”

Grupi hetimor ndodhet në vendin e ngjarjes dhe po vijon punën për dokumentimin e plotë të rrethanave dhe shkaqeve të vdekjes.

Kjo ngjarje rikthen në vëmendje nevojën për kontrolle të rregullta shëndetësore, veçanërisht për moshat e treta, para frekuentimit të plazhit, si dhe rëndësinë e monitorimit mjekësor në zonat bregdetare gjatë sezonit turistik.