Një ngjarje e rëndë është regjistruar pasditen e së martës në Greqi, ku një fëmijë 3-vjeçar humbi tragjikisht jetën pasi ra nga ballkoni i banesës së bashku me një 25-vjeçar që e mbante në krahë.

Sipas mediave greke, fëmija po qante dhe ishte i shqetësuar, ndaj i riu vendosi ta merrte në krahë për ta qetësuar me një shëtitje të shkurtër. Por ngjarja mori fund tragjik kur 25-vjeçari goditi kokën në buzë të ballkonit, humbi ndjenjat dhe ra në boshllëk, duke tërhequr me vete edhe fëmijën.

“Fëmija ishte i shqetësuar dhe qante. 25-vjeçari e mori në krahë për ta qetësuar. Ndërsa po ecte, goditi kokën në buzë të ballkonit, u trullos dhe ra me fëmijën në krahë nën gardh,” – ka treguar gjyshi i të miturit për mediat lokale.

Fëmija pësoi dëmtime të rënda në kokë dhe u transportua me urgjencë në spital, ku u intubua menjëherë, por pavarësisht përpjekjeve të mjekëve, nuk mundi të mbijetonte pas një atak kardiak.

Ndërkohë, 25-vjeçari ndodhet në gjendje të rëndë, ndërsa autoritetet greke po hetojnë rrethanat e plota të tragjedisë që ka tronditur komunitetin lokal.