Një ngjarje e rëndë ka tronditur botën e muzikës në Shtetet e Bashkuara. Reperi i njohur G$ Lil Ronnie ka ndërruar jetë në moshën 30-vjeçare, së bashku me vajzën e tij pesëvjeçare, si pasojë e një sulmi me armë zjarri në Forest Hill, Teksas.

Sipas raportimeve të ‘Marca’, ngjarja ndodhi në një lavazh, ku një automjet i bardhë iu afrua reperit dhe dy burra hapën zjarr. Fatkeqësisht, plumbat qëlluan edhe vajzën e tij të mitur, duke i marrë jetën në vend.

Autorët janë larguar menjëherë, ndërsa forcat e rendit kanë mbërritur në skenën e krimit, ku kanë gjetur dy viktimat pa shenja jete. Raportimet nga dëshmitarët tregojnë se në lavazhin e Forest Hill janë dëgjuar deri në 30 të shtëna.

Hetimet vazhdojnë, ndërsa autoritetet tashmë kanë identifikuar njërin prej dy të dyshuarve dhe kanë lëshuar një urdhër arresti.

Tezja e reperit tha për CBS: “Ai ishte një reper. Nuk shqetësonte askënd, nuk sulmoi askënd. Ishte një njeri i familjes. Po pastronte makinën dhe dikush hyri duke qëlluar mbi të dhe foshnjën e tij. Një foshnjë. Foshnja e tij.”

Kjo tragjedi ka tronditur komunitetin muzikor dhe ka ngritur edhe një herë shqetësimin për dhunën me armë në SHBA.