Bolzano, Itali – 15 Qershor 2025 – Një aksident tragjik ka ndodhur këtë mëngjes në veri të Italisë, në autostradën pranë pikës së pagesës në Bolzano Jug, ku një automjet që ka hyrë në mënyrë të gabuar në rrugë ka shkaktuar një përplasje frontale me pasoja fatale.

Sipas informacioneve paraprake të autoriteteve italiane, automjeti që shkaktoi aksidentin ka hyrë në drejtim të gabuar në autostradë, duke lëvizur kundër trafikut dhe duke u përplasur me një tjetër mjet që po lëvizte në korsinë e duhur. Një person humbi jetën në vend, ndërsa pesë të tjerë mbetën të plagosur, disa prej tyre rëndë.

Menjëherë pas aksidentit, në vendngjarje mbërritën forcat zjarrfikëse të Bolzanos, njësi të policisë rrugore si dhe ekipet e ndihmës së shpejtë. Të plagosurit u transportuan drejt spitaleve për trajtim të menjëhershëm.

Dy prej të lënduarve u dërguan në spitalet e Bressanones dhe Trentos, ndërsa tre fëmijë, të moshave 8, 11 dhe 14 vjeç, u transportuan me helikopter drejt Klinikës Universitare të Innsbruckut, në Austri, për shkak të gjendjes së tyre të rënduar.

Autoritetet italiane kanë nisur hetimet për të zbuluar arsyet që çuan në hyrjen e gabuar të mjetit në autostradë dhe përgjegjësinë për aksidentin tragjik.