Të paktën katër persona kanë humbur jetën dhe rreth 20 të tjerë janë plagosur nga të shtënat me armë zjarri në një bar të mbushur me njerëz në Ishullin Saint Helena, në Karolinën e Jugut, mëngjesin e së dielës me orën lokale.

Sipas autoriteteve, një turmë e madhe ndodhej brenda lokalit në momentin kur shpërthyen të shtënat. Kur policia mbërriti në vendngjarje, gjeti disa viktima me plagë të rënda nga armët e zjarrit.

Një person i dyshuar është identifikuar, por deri më tani nuk ka pasur arrestime zyrtare, ndërsa motivi i ngjarjes mbetet i paqartë. Hetimet janë në zhvillim.

Mes të plagosurve, katër persona janë në gjendje kritike dhe po marrin trajtim në spitalet e zonës.

Ngjarja ndodh vetëm pak ditë pas një tjetër sulmi të përgjakshëm në Misisipi, ku humbën jetën katër persona dhe të paktën 16 të tjerë u plagosën, ndërsa dy viktima të tjera u regjistruan në një aktivitet shkollor në Heidelberg.

Sipas Arkivit të Dhunës me Armë (Gun Violence Archive), Shtetet e Bashkuara kanë regjistruar afro 340 të shtëna masive që nga fillimi i vitit – ngjarje ku katër ose më shumë persona mbeten të vrarë, pa përfshirë autorin e sulmit.