Një ngjarje e rëndë ka ndodhur në fshatin Shalës, Konispol, ku një burrë ka vrarë bashkëshorten e tij dhe më pas është përfshirë në një konflikt të dhunshëm me djalin e tij, i cili rezultoi fatale për të.

Sipas raportimeve, rreth orës 07:00 të mëngjesit, shtetasi H. I., 69 vjeç, ka sulmuar bashkëshorten e tij, shtetasen Sh. I., 66 vjeçe, duke e goditur me një sopatë dhe duke i marrë jetën. Pas kësaj ngjarjeje, H. I. është përfshirë në një konflikt të ashpër me djalin e tij, shtetasin K. I., rreth 40 vjeç. Ky i fundit ka hedhur të atin nga shkallët e banesës, si pasojë e së cilës 69-vjeçari ka ndërruar jetë në vendngjarje.

Njoftimi i policisë për ngjarjen është si më poshtë:

“Rreth orës 07:00, në fshatin Shalës, Konispol, dyshohet se gjatë një konflikti për motive të dobëta, në banesë, shtetasi H. I., 69 vjeç, ka vrarë me mjet prerës (dyshohet sëpatë) bashkëshorten e tij, shtetasen Sh. I., 66 vjeçe. Më pas, shtetasi H. I. dyshohet se është konfliktuar me djalin e tij, shtetasin K. I., rreth 40 vjeç, i cili e ka shtyrë shtetasin H. I. nga shkallët e banesës. Si pasojë e dëmtimeve, shtetasi H. I. ka humbur jetën në vendngjarje.”

Pas marrëveshjes së njoftimit, shërbimet e Stacionit të Policisë Konispol janë angazhuar menjëherë dhe kanë bërë të mundur kapjen dhe shoqërimin e autorit të dyshuar, shtetasit K. I. në ambientet e Policisë. Grupi hetimor, nën drejtimin e Prokurorisë, është duke punuar për të sqaruar të gjitha rrethanat e ngjarjes dhe për të ndjekur procedurat e mëtejshme ligjore.