Një ngjarje tragjike ka ndodhur në Leeds, ku një grua shtatzënë, e identifikuar si Emma Atkinson, humbi jetën pasi ra nga kati i 17-të i një ndërtese. Mrekullisht, foshnja e saj e palindur mbijetoi. Mjekët arritën të nxjerrin vajzën e gjallë nga trupi i gruas, pesë javë para datës së parashikuar të lindjes. Aktualisht, foshnja ndodhet në kujdesin intensiv (ICU).

Policia britanike nuk ka bërë të ditur ende shkaqet e rënies dramatike, por nuk ka rrethana të dyshimta që lidhen me këtë ngjarje. Fqinjët raportuan se dritarja e shtëpisë kishte qenë e hapur gjatë gjithë ditës, derisa dëgjuan një zhurmë dhe britma paniku.

Emma Atkinson, vetëm një muaj më parë, kishte ndarë lajmin e gëzueshëm të shtatzënisë në Facebook: “Është vajzë, nuk mund të isha më e lumtur”. Pas tragjedisë, shumë banorë të zonës vendosën lule dhe balona në kujtim të saj, ndërsa në një prej buqetave lexohej: “Qielli ka fituar një engjëll tjetër”.