Një ngjarje e rëndë ka tronditur Maltën, ku një vajzë 13-vjeçare humbi jetën në det gjatë pushimeve me familjen e saj.

Trupi i pajetë i vajzës u gjet këtë të mërkurë në mëngjes në ujërat e “Paradise Bay”, pas tre ditësh kërkimesh intensive nga zhytësit e Mbrojtjes Civile. Sipas raportimeve të mediave të huaja, një dallgë e fuqishme e tërhoqi vajzën në det, ndërsa babai dhe vëllai i saj u përplasën pas murit mbrojtës. Babai mbeti i lënduar gjatë përpjekjeve për ta shpëtuar të bijën.

Autoritetet malteze nisën menjëherë një operacion të gjerë kërkimi, ku u angazhuan forcat e ushtrisë, mbrojtja civile dhe policia. Ata kanë nisur një hetim për të sqaruar rrethanat e ngjarjes, ndërsa familjes po i ofrohet ndihmë psikologjike.

Institucionet malteze u kanë bërë thirrje qytetarëve dhe turistëve të shmangin zonat e rrezikshme bregdetare gjatë motit të keq dhe detit të trazuar.