Një ngjarje e rëndë ka tronditur komunitetin shqiptar në Itali. Endrit Ademi, një 24-vjeçar nga Kosova, ka ndërruar jetë mëngjesin e sotëm në Milano pasi ra nga kati i tretë i një pallati gjatë një ndërhyrjeje në fasadë. Ngjarja ndodhi rreth orës 9:30, ndërsa i riu po kryente punime mirëmbajtjeje dhe, për shkaqe ende të paqarta, rrëshqiti nga skela dhe ra nga një lartësi prej rreth 12 metrash, duke gjetur vdekjen e menjëhershme.

Ademi jetonte në Itali prej gjashtë vitesh, ndërsa prindërit dhe një nga vëllezërit e tij banojnë në Kosovë. Vëllai tjetër ndodhet në Austri. Një bashkëatdhetar i tij, i cili ndodhej pranë vendit të ngjarjes, tha mes lotësh: “Ai ishte një djalë i mirë, një mik i imi.”

Prokuroria e Milanos ka nisur hetimet për të zbuluar nëse janë respektuar rregullat e sigurisë në vendin e punës. Trupi i pajetë do t’i nënshtrohet autopsisë dhe ekspertizave të nevojshme.

Tragjedia rikthen edhe një herë në vëmendje çështjen e kushteve të sigurisë për emigrantët shqiptarë që punojnë në ndërtim në Itali.