Në fshatin Nikoliq të Hasit, familja Lushi ka hapur sot dyert e mortit për të ndjerët Rexh Lushi, 57 vjeç, dhe nënën e tij, Fatime Lushi, të cilët humbën jetën tragjikisht pas një zjarri që përfshiu banesën e tyre në orët e para të 19 shtatorit. Banorët e fshatit dhe të afërmit e viktimave janë të tronditur nga ngjarja dhe kanë treguar momentet e tmerrshme të asaj nate.

Një bashkëfshatar, Shkozet Bebexhia, tregoi se nuk kishte asnjë mundësi për të ndihmuar gjatë incidentit. Ai përshkroi se si bashkëshortja e Rexhit, pasi kishte dalë nga shtëpia, e kishte thirrur atë për të dalë jashtë, por nuk kishte marrë përgjigje. “Rexha jetonte këtu me nënën dhe bashkëshorten. Fëmijët dhe vëllezërit e tij janë në emigrim, në Angli. Në mesnatë, pasi kishte dalë jashtë dhe lajmëruar policinë, ai u fut përsëri në shtëpi për të shpëtuar nënën, por fatkeqësisht nuk doli më,” rrëfeu Bebexhia.

Fqinjët treguan se trupat e viktimave u gjetën në gjendje të rëndë. Neritan Koka, një tjetër banor i fshatit, tha: “Rexhën e gjetëm në kuzhinë, duke u djegur. E nxorëm jashtë, por ai ishte plotësisht i dëmtuar, i shkrirë.”

Dyshimet e banorëve janë se zjarri është shkaktuar nga një problem me energjinë elektrike. “Zjarri mund të ketë ardhur nga energjia, sepse nuk kishte ndonjë problem tjetër. Fatimja ishte 82 vjeç, ndërsa Rexha 57 për 58,” shtoi Bebexhia.

Ndërkohë, kushëriri i viktimave, Kadri Lushi, mes dhimbjes dhe dëshpërimit tregoi se Rexha e sakrifikoi jetën për të shpëtuar nënën. “Kur morëm vesh për ngjarjen, gruaja tregoi se Rexha kishte hyrë brenda për të shpëtuar nënën dhe nuk doli më. Ishte një tragjedi e madhe, Rexha vdiq për nënën e tij. Ai kishte tre fëmijë në emigrim, dy në Londër dhe një në Francë. Dhimbja është e papërshkrueshme,” tha Kadri Lushi.

Kjo ngjarje tragjike ka lënë një plagë të thellë në komunitetin e fshatit, ndërsa grupi hetimor vijon hetimet për të përcaktuar shkaqet e zjarrit.