Një ngjarje e rëndë ka tronditur pasditen e sotme zonën pranë lumit Shkumbin, ku dy fëmijë të mitur, vetëm 7 dhe 9 vjeç, humbën jetën tragjikisht pasi u mbytën në ujërat e lumit teksa po laheshin. Ngjarja ka lënë të shokuar komunitetin lokal dhe familjet e viktimave.

Një i afërm i familjes ka rrëfyer momentet e para të ndihmës dhe tronditjen e përjetuar, duke pohuar se një prej fëmijëve u nxor nga një punëtor i hidrocentralit, ndërsa fëmija tjetër nga një efektiv policie. Të dy ishin në gjendje të pajetë në momentin që u gjetën.

“Isha në punë kur pashë policinë që vinte me vrap. Një zotëri që punon te hidrocentrali mbante një nga fëmijët në krah. Pashë nënën që përplasej, e shkatërruar… të atin nuk e di ku shkoi. Janë të afërmit e mi, u nisa edhe unë me vrap,” – tregon i afërmi.

Fëmijët ishin bashkë me nënën, duke ndihmuar në kullotjen e bagëtive, një rutinë e zakonshme për familjen që merret me blegtori. Por një moment pushimi në ujë u kthye në tragjedi, pasi ata u futën për t’u larë në një pjesë të thellë të lumit, ku sipas dëshmive, ka një gropë të krijuar nga ndërhyrjet për ndërtimin e një prite.

“Aty ku është bërë gropa e madhe, i gjeti roja i hidrocentralit. Njërin fëmijë e kishte polici në krah, ja mora, i bëra frymëmarrje artificiale, por nuk pati asnjë reagim. Vinin çdo ditë aty te puna ime, mbushnin ujë, rrinin kur ishte vapë,” – shton dëshmitari.

Prindërit e dy fëmijëve ndodhen në gjendje të rëndë psikologjike. Familja jetonte nga blegtoria, ku fëmijët ndihmonin çdo ditë në mbajtjen e bagëtive. Tragjedia ka prekur thellë komunitetin dhe ka ngritur shqetësime për sigurinë përgjatë shtratit të lumit, veçanërisht në zonat ku mungojnë tabelat paralajmëruese apo mbrojtëse.

Policia dhe grupi hetimor ndodhen në vendin e ngjarjes për të dokumentuar rrethanat dhe për të përcaktuar nëse ka pasur neglizhencë nga strukturat përgjegjëse për sigurinë në këtë zonë.