Një numër traktorësh janë parkuar para parkut “Pioneri” në Beograd, megjithëse nuk kanë leje zyrtare për ta bërë këtë. Shumica e tyre janë pa targa ose me targa të mbuluara, duke ngritur dyshime mbi qëllimin e vërtetë të vendosjes së tyre.

Sipas mediave serbe, qeveria mund të ketë disa skenarë të mundshëm për përdorimin e këtyre traktorëve. Një ndër teoritë më të përfolura është se ato mund të shfrytëzohen për të ushtruar presion mbi protestuesit dhe për të krijuar një atmosferë frike, me qëllim frenimin e pjesëmarrjes në protestën e paralajmëruar.

Gjithashtu, raportohet se disa nga kompanitë që posedojnë këta traktorë janë takuar më parë me presidentin Aleksandër Vuçiç, duke ngritur dyshime mbi një mundshëm koordinim mes tyre dhe autoriteteve shtetërore.

Një teori tjetër sugjeron se traktorët janë vendosur për të bllokuar hyrjet kryesore të Beogradit më 15 mars, duke penguar pjesëmarrësit të arrijnë në protestë. Pamjet tregojnë qindra traktorë të pozicionuar në zona të ndryshme të kryeqytetit, jo vetëm një ditë përpara protestës, por edhe prej disa ditësh.

Ende nuk ka një konfirmim zyrtar mbi qëllimin e kësaj lëvizjeje, por situata ka nxitur debate dhe shqetësime mbi ndikimin e mundshëm të saj në protestat e planifikuara.