Tiranë – Tre nga 16 efektivët e lënduar gjatë protestës së dhunshme të Partisë Demokratike më 10 shkurt ndodhen në gjendje të rëndë në spital, pas djegieve të shkaktuara nga molotovët e hedhur nga protestuesit.

Drejtori i Rendit Publik, Agron Çeli, deklaroi se efektet e këtyre lëndëve djegëse janë të rrezikshme dhe të pakontrollueshme: “Flaka është e menjëhershme dhe e pakontrollueshme, sjell pasoja të rënda për efektivët e ekspozuar,” tha ai.

Molotovët përmbajnë lëndë djegëse si benzina dhe shuarja e flakëve është e vështirë edhe për zjarrfikësit. Përdorimi i tyre përbën vepër penale, me dënime që variojnë nga 1 deri në 10 vite burg, në varësi të pasojave.

“Policia e shtetit ka ndërhyrë sipas procedurave standarde. Fillimisht ka bërë thirrje që në momentin e parë që tubuesit kanë përdorur jo vetëm shtyrjen, por kanë hedhur molotovë. Është dhënë urdhri për të komunikuar me tubuesit për të ndaluar hedhjen e mjeteve djegëse. Pasi nuk është bërë kjo, është përdorur ujëhedhësi.
Te kryeministria nuk është përdorur gaz lotsjellës. Tubuesit u shpërndanë, shkuan para Kuvendit. Atje me përshkallëzimin e konfliktit, pas 30 minutash kanë marrë furnizimin tjetër me lëndë djegëse dhe i kanë përdorur, i kanë hedhur kundër policëve. Policia e shtetit ka treguar durim dhe sipas procedurave, ka përdorur të gjitha mjetet për shpërndarjen e tubuesve sepse është rrezikuar seriozisht jeta e tyre”, tha ai.