Policia e Tiranës ka vënë në pranga tre persona, mes tyre dy të mitur, të dyshuar si autorë të nëntë vjedhjeve të ndodhura gjatë muajve të fundit në kryeqytet.

Në kuadër të operacionit të koduar “Recidivisti”, u arrestua 26-vjeçari E. R., i dyshuar për pesë vjedhje në subjekte të ndryshme, ku ka marrë portofola, celularë dhe shuma parash. Arrestimi u krye nga Komisariati Nr. 1, në bashkëpunim me Policinë e Vlorës.

Ndërsa në një tjetër operacion, të koduar “Duo”, Komisariati Nr. 6 ndaloi dy të mitur, 14 dhe 15 vjeç, të cilët akuzohen për katër vjedhje të tjera. Ata dyshohet se kanë marrë një motomjet në Astir, kanë vjedhur dy dyqane me sende dhe para, si dhe një objekt brenda një automjeti.

Policia njoftoi se vijon puna për dokumentimin e rasteve të tjera që mund të jenë kryer nga të ndaluarit, ndërsa materialet hetimore i janë kaluar Prokurorisë së Tiranës për veprime të mëtejshme.