Pas pesë ditësh kërkime, palombarët kanë arritur të nxjerrin nga lumi i Shalës trupin e pajetë të Edison Oruqit, babait të pesë fëmijëve, i cili rezultonte i zhdukur që prej së shtunës.

Trupi i tij u gjet paraditen e sotme dhe vetëm pak më parë u bë e mundur nxjerrja e tij nga uji.

Sipas raportimeve, 40-vjeçari kishte shkuar për të punuar në një bujtinë, por më pas humbi gjurmët në rrethana ende të paqarta. Dyshohet se personi që e kishte punësuar e ka lënë atë në një gadishull të vogël me rërë, në një zonë ku varka nuk mund të mbërrinte, duke e vënë kështu në rrezik të madh.
Autoritetet po vijojnë hetimet për të zbardhur plotësisht ngjarjen dhe për të përcaktuar shkaqet e vërteta të humbjes së jetës së tij.