Një ngjarje e rëndë ka ndodhur këtë të martë në Sarandë, ku një 15-vjeçare është vetëhedhur nga kati i katërt i banesës së saj, pas dyshimeve se ishte viktimë e bullizmit nga bashkëmoshatarët.

Adoleshentja, e cila fatmirësisht mbijetoi, ndodhet nën kujdesin e mjekëve në Tiranë dhe është jashtë rrezikut për jetën. Ajo u shpëtua nga goditja fatale pasi ra mbi tendën e katit të mëposhtëm, gjë që zbuti përplasjen.

Babai i saj, në një rrëfim të ndjerë për mediat, tha se vajza sapo ishte kthyer nga shkolla dhe i kishte treguar të vëllait se ishte ofenduar nga shokët e klasës:

“Një djalë dhe një vajzë i kishin thënë që je e shpifur. I vëllai i tha të mos mërzitej se do e zgjidhnim.”

Sipas tij, ngjarja ndodhi në një moment gëzimi familjar. Familja ishte mbledhur për të festuar ditëlindjen e djalit të vogël, kur 15-vjeçarja u largua në dhomë dhe pak çaste më vonë u hodh nga ballkoni.

Policia dhe specialistët e shëndetit po hetojnë rrethanat, ndërsa rasti ka ngritur sërish alarmin për pasojat e bullizmit tek të rinjtë.