Tropojë – Komisariati i Policisë Tropojë ka zhvilluar kontrolle intensive gjatë dy ditëve të fundit, duke evidentuar dhe goditur 7 raste të ndërtimit pa leje në zona të mbrojtura dhe bjeshkë të rajonit.

Në kuadër të veprimeve, specialistët për Hetimin e Krimeve shpallën në kërkim shtetasit S.B., 47 vjeç, nga fshati Gegaj, i cili kishte ndërtuar një objekt pa leje në bjeshkën e “Ujzës”, si dhe A.D., banues në Tiranë, i cili po ndërtonte një objekt në lagjen “Malaj” të Valbonës, gjithashtu në një zonë të mbrojtur. Për këtë të fundit u procedua në gjendje të lirë edhe babai, S.D.

Gjithashtu, materialet iu referuan Prokurorisë për procedim në gjendje të lirë ndaj shtetasve G.K. dhe S.A. nga Tropoja, për ndërtime pa leje në bjeshkët e “Sylbicës”, P.Gj. nga Puka për punime ndërtimi në fshatin Breg Lumi, si dhe K.H. nga Viçidoli për ndërtim pa leje në bjeshkët “Rrëzë Shkëlzenit”.

Policia apelon qytetarët të respektojnë ligjin dhe të mos kryejnë ndërtime pa lejen e organeve kompetente, për të ruajtur ambientin dhe zonat e mbrojtura.