Presidenti amerikan Donald Trump ka pritur sot në Shtëpinë e Bardhë një grup udhëheqësish evropianë, të cilët kanë mbërritur në Uashington për takime të nivelit të lartë mbi sigurinë dhe zhvillimet në Ukrainë.
Takimi me liderët e Evropës u parapri nga një dalje e përbashkët e Trump me presidentin ukrainas Volodymyr Zelenskyy, ku të dy iu përgjigjën pyetjeve të gazetarëve.
Pas këtij momenti, Trump u zhvendos për t’u bashkuar me krerët evropianë dhe së bashku realizuan një “foto familjare”, si shenjë uniteti përballë sfidave ndërkombëtare.
Në Shtëpinë e Bardhë sot udhëtuan:
• Sir Keir Starmer, Kryeministër i Mbretërisë së Bashkuar
• Ursula von der Leyen, Presidente e Komisionit Evropian
• Emmanuel Macron, President i Francës
• Giorgia Meloni, Kryeministre e Italisë
• Friedrich Merz, Kancelar i Gjermanisë
• Alexander Stubb, President i Finlandës
• Mark Rutte, Sekretar i Përgjithshëm i NATO-s
Prania e një liste kaq të gjerë liderësh evropianë tregon peshën e bisedimeve që do të zhvillohen në Uashington, të cilat pritet të fokusohen te mbështetja për Ukrainën, marrëdhëniet transatlantike dhe koordinimi brenda NATO-s.
