Presidenti i SHBA-së, Donald Trump, njoftoi se duke filluar nga 1 gushti, India do të përballet me tarifa shtesë prej 25% për një sërë produktesh që hyjnë në tregun amerikan.

Në një postim në rrjetet sociale, Trump u shpreh se bilanci tregtar mes dy vendeve është “i padrejtë” në kurriz të SHBA-së dhe e akuzoi Nju Delhin se, bashkë me Pekinin, po mbështet makinerinë ruse të luftës përmes blerjeve të mëdha të energjisë dhe bashkëpunimit ushtarak me Moskën.

“Kina dhe India vazhdojnë të financojnë Rusinë duke i blerë energji masivisht dhe duke bërë marrëveshje ushtarake. Kjo do të ketë pasoja,” shkroi ai.

Trump paralajmëroi gjithashtu masa ndëshkuese shtesë ndaj Indisë për bashkëpunimin me Rusinë, pa dhënë detaje për përqindjen apo natyrën e këtyre sanksioneve.

Njoftimi vjen pas një sërë deklaratash të ngjashme të presidentit amerikan, i cili këto ditë ka bërë publike marrëveshje tregtare me Japoninë dhe Bashkimin Europian, duke paralajmëruar një qasje më të ashpër ndaj vendeve që sipas tij dëmtojnë interesat ekonomike dhe strategjike të SHBA-së.