Një ngjarje makabre ka tronditur Greqinë këtë të premte, pasi autoritetet zbuluan trupin e një shqiptari të djegur dhe të prangosur në sediljen e pasme të një automjeti në një zonë të Athinës.
Sipas mediave greke, makina rezulton e vjedhur dhe me targa të falsifikuara, ndërsa hetimet janë marrë nën përgjegjësinë e Departamentit të Hetimit të Krimit të Organizuar — i njohur si “FBI greke”.
Dyshohet se viktima, ende e paidentifikuar, kishte tre ditë i vdekur në makinë, derisa trupi i tij u zbulua rastësisht nga një gjuetar që kalonte në zonë.
Autoritetet po hetojnë pistën e një ekzekutimi mafioz, duke u përqendruar te lidhjet e mundshme të viktimës me grupe kriminale. Ekspertiza mjeko-ligjore dhe analizat e ADN-së pritet të ndihmojnë në identifikimin e viktimës dhe zbardhjen e plotë të ngjarjes që ka tronditur opinionin publik grek.
