Ukraina ka njoftuar se ka pranuar trupat e 1.200 personave të vrarë, të identifikuar si shtetas ukrainas, si pjesë e një marrëveshjeje të arritur me Rusinë gjatë bisedimeve të fundit të paqes në Stamboll. Sipas shtabit ukrainas për të burgosurit e luftës, trupat e dorëzuara përfshijnë edhe ushtarë të Forcave të Armatosura të Ukrainës.

“Trupat e 1.200 personave të vdekur janë kthyer në Ukrainë,” thuhet në deklaratën zyrtare të lëshuar të premten.

Dorëzimi është bërë në kuadër të një procesi që Rusia e ka prezantuar si një akt humanitar, teksa javën e kaluar Moska njoftoi se ishte e gatshme të dorëzonte trupat e 6.000 ushtarëve ukrainas të vrarë, në mënyrë të njëanshme. Kievi, megjithatë, e ka cilësuar këtë veprim si “këmbim trupash”, dhe më vonë e akuzoi Moskën për “lojë të ndyrë politike” pas pretendimeve ruse se Ukraina po vononte pranimin e trupave.

Faza e parë e marrëveshjes është zbatuar me dorëzimin e 1.212 trupave, sipas burimeve ruse, duke shënuar një nga të paktat forma bashkëpunimi mes dy vendeve që prej nisjes së pushtimit rus në vitin 2022.

Pavarësisht këtij hapi simbolik, bisedimet e paqes në Stamboll nuk kanë sjellë asnjë përparim konkret drejt një armëpushimi. Rusia vazhdon të refuzojë ndaljen e ofensivës ushtarake dhe ka kushtëzuar çdo marrëveshje paqeje me dorëzimin e më shumë territori nga Ukraina dhe ndërprerjen e mbështetjes perëndimore për Kievin.