Detaje të reja kanë dalë në dritë pas gjetjes së trupit të pajetë të Miklovan Dakajt, 30 vjeç, i njohur edhe si Visi i Pojës, në brigjet e Marbella, Spanjë. Sipas raportimeve, personi i fundit që kishte kontakt me Dakajn ishte Juxhin Drazhi, i lidhur me grupin e Elvis Doçit.

Dakaj kishte humbur kontaktet me familjarët më 12 maj të këtij viti. Sipas denoncimeve të familjarëve, ai kishte qenë disa orë më parë me bashkëshorten e tij në një qendër shëndetësore për të bërë vaksinën e fëmijës së mitur. Pas ndarjes së tyre, ai nuk u lidh më në telefon, dhe gruaja e tij bëri kallëzim në policinë spanjolle. Njëkohësisht, familjarët në Shkodër denoncuan zhdukjen e tij.

Media spanjolle Costablancadaily raportoi se trupi i Dakajt u gjet pasditen e sotme në Marbella. Të afërmit morën një telegram që konfirmonte vrasjen e tij dhe u paralajmërua që të mos e kërkonin. Referuar informacioneve mediatike, Dakaj ishte i përfshirë në trafikun e kokainës dhe në klane ndërkombëtare.

Guardia Civil ka nisur një hetim në Marbella, por deri më tani nuk ka pasur arrestime dhe autoritetet nuk kanë dhënë detaje mbi rrethanat e gjetjes së trupit. Rasti po shqyrtohet me kujdes, duke u fokusuar te lidhjet e tij me krimin e organizuar dhe personat e fundit që e panë.