Trupi i Liridona Ademaj, e cila humbi jetën tragjikisht, do të prehet sot në varrezat e fshatit Rracaj, komuna e Gjakovës, aty ku ajo edhe lindi. Pas kërkesës së familjes së saj, autoritetet kanë pranuar zhvarrosjen e saj nga varrezat në fshatin e lindjes së burrit të saj.

Familjarët e të ndjerës kishin paraqitur një kërkesë zyrtare për prokurorinë Besa Limani për të lejuar zhvarrosjen dhe rivarrimin e Liridonës pranë fshatit Rracaj.

Ndërkaq, Gjykata Themelore në Prishtinë ka caktuar masën e paraburgimit për 30 ditë ndaj Naim Murselit, Granit Pllavës dhe Kushtrim Kokallës për vrasjen e Liridona Murselit.

Bashkëshorti i viktimës, i akuzuar për urdhërimin e ekzekutimit, përballet me akuza për “Vrasje të Rëndë të Kryer në Bashkëpunim”. Granit Pllava, ekzekutori, akuzohet për “Vrasje të Rëndë dhe Armëmbajtje pa Leje”, ndërsa Kushtrim Kokalla akuzohet për “Marrëveshje për të Kryer një Vrasje të Rëndë”.

Gjykata ka vendosur masën e paraburgimit pas një seance dëgjimore të mbajtur dje, të cilën e karakterizoi mbyllja për median dhe mbajtja pa praninë e publikut.