Himarë – Një turiste spanjolle ka marrë ndihmën e menjëhershme të Policisë së Himarës dhe të disa pushuesve të rastësishëm, pasi është rrëzuar dhe ka pësuar dëmtime në kokë në zonën e vështirë të plazhit të Filikurit.

Ngjarja ndodhi këtë të dielë, rreth orës 16:00, kur Salla Operative njoftoi patrullën e rendit të Komisariatit të Policisë Himarë për një shtetase të huaj që kishte pësuar një incident në këtë zonë të izoluar bregdetare.

Menjëherë pas njoftimit, shërbimet e policisë u drejtuan në vendin e ngjarjes dhe konstatuan se turistja spanjolle kishte rrëshqitur, duke pësuar dëmtime në kokë dhe duke mbetur e bllokuar në terrenin e vështirë.

Falë ndërhyrjes së shpejtë të punonjësve të Policisë dhe bashkëpunimit me pushuesit e pranishëm, u bë e mundur nxjerrja e saj nga zona ku ishte lënduar dhe transportimi me ambulancë drejt Qendrës Shëndetësore të Himarës. Aktualisht, ajo ndodhet nën kujdesin e mjekëve.

Policia e Himarës shprehu mirënjohje për solidaritetin dhe gatishmërinë e pushuesve që ndihmuan në këtë rast, si dhe theksoi përkushtimin për të ofruar siguri dhe reagim të shpejtë në çdo situatë emergjente për qytetarët dhe turistët.