Një përplasje ka ndodhur gjatë seancës parlamentare midis deputetes së PD-së, Jorida Tabaku, dhe drejtueses së seancës, Ermonela Felaj. Felaj mbajti një fjalim lidhur me vrasjen e efektivit të policisë në Fier, duke akuzuar strukturat e mbrojtjes së votës të ngritura nga PD për lidhje kriminale. Ajo bëri thirrje që organet e drejtësisë të nisin hetime për këto grupe, të cilat i quajti kriminale.
Kur Jorida Tabaku filloi të komentonte deklaratën e Felaj, fjala iu ndërpre, duke shkaktuar reagimin e saj të menjëhershëm.
Dialogu midis Felaj dhe Tabaku:
Felaj: Strukturat e ligjit janë të detyruara të veprojnë edhe kryesisht, pa kallëzim. Duhet të rikthehen tek historia e krijimit të këtyre strukturave dhe tek deputetët që kanë preferuar të kenë kontingjente kriminale për të mbledhur vota. Duhet të analizohen profilet e këtyre personave, sepse janë grupe kriminale. SPAK dhe BKH duhet të kenë vëmendje ndaj këtyre çështjeve. Nuk na lejohet të zgjedhurve në këtë sallë të fusim kriminelët nga dritarja, pasi i kemi nxjerrë nga dera me ligjin e dekriminalizimit. Deputetët nuk janë distancuar nga personi në fjalë, por kanë bërë deklarata zhgënjyese gjatë mitingut para bashkisë.
Tabaku: Ne po diskutojmë një marrëveshje me Interpolin për një konferencë. Nuk është përdorur për politikë. Është e turpshme që ju, zonjë që drejtoni seancën, përdorni vdekjen për politikë.
Felaj: Ju nuk keni të drejtë të komentoni fjalën time. Nëse dëshironi të flisni për këtë pikë të rendit të ditës, ju pyeta dhe thatë JO. Uluni. Nuk keni të drejtë të komentoni fjalën e një kolegu tjetër. Nëse ndiheni të mbështetur nga kriminelë, distancohuni. Mos bëjmë lojëra. Nuk kam pse t’ju jap fjalën sepse jua dhashë dhe nuk e shfrytëzuat.
Tabaku (nga vendi):
Turp të të vijë që përdor vdekjen për politikë.
Kjo përplasje nxjerr në pah tensionet e forta brenda Kuvendit dhe mosmarrëveshjet mes palëve politike lidhur me çështje të ndjeshme si siguria dhe drejtësia.
