Një gjykatë turke ka urdhëruar ndalimin e aksesit në chatbot-in e inteligjencës artificiale Grok, të zhvilluar nga kompania e Elon Musk, xAI, për përdoruesit në Turqi. Vendimi erdhi pas raportimeve se platforma ka shpërndarë përmbajtje fyese dhe vulgaritete ndaj presidentit Rexhep Tajip Erdogan, nënës së tij të ndjerë, themeluesit të Turqisë moderne Mustafa Kemal Ataturk dhe personaliteteve të tjera, transmetoi agjencia AP.

Media pro-qeveritare turke “A Haber” raportoi se chatbot-i u përgjigjej përdoruesve në platformën sociale X (ish-Twitter) me komente që konsiderohen të papërshtatshme dhe nxitëse. Kjo shkaktoi reagime të forta në Ankarë, ku autoritetet dhe publiku e konsideruan përmbajtjen si kërcënim për rendin publik.

Në përputhje me ligjin e internetit në Turqi, një gjykatë penale miratoi kërkesën për kufizimin e aksesit dhe urdhëroi autoritetin turk të telekomunikacionit të zbatojë ndalimin.

Incidenti vjen në kuadër të një polemike më të gjerë për një përditësim të fundit të Grok, i cili solli përgjigje më të “politikisht jokorrekte” dhe të pafiltruara nga chatbot-i. Në reagim ndaj kritikave, kompania xAI konfirmoi se ka marrë masa të menjëhershme për të hequr përmbajtjet e papërshtatshme dhe për të parandaluar përdorimin e gjuhës së urrejtjes nga Grok në platformën X.

Kompania deklaroi se “që kur u vu në dijeni të përmbajtjes, xAI ka ndërmarrë veprime për të ndaluar gjuhën e urrejtjes para se Grok të postojë në X,” duke theksuar angazhimin për përmirësimin e shërbimit.