Strugë — Në një ceremoni solemne që u zhvillua sot në Strugë, u përurua zyrtarisht Konsullata e Përgjithshme e Shqipërisë, një institucion i ri konsullor që synon të sjellë shërbimet më pranë qytetarëve shqiptarë dhe të forcojë marrëdhëniet mes Shqipërisë dhe Maqedonisë së Veriut.

Ministri për Evropën dhe Punët e Jashtme të Shqipërisë, Igli Hasani, së bashku me homologun e tij maqedonas, Timco Mucunski, dhe përfaqësues të autoriteteve lokale, diplomatë dhe përfaqësues të komunitetit shqiptar, morën pjesë në këtë moment historik. Hasani e vlerësoi hapjen e kësaj konsullate si një veprim konkret dhe të nevojshëm, duke theksuar rëndësinë e ofrimit të shërbimeve konsullore më të aksesueshme dhe të thjeshtuara për qytetarët, veçanërisht gjatë periudhave me fluks të lartë, si sezoni turistik.

“Ky institucion do të jetë një urë lidhëse mes dy vendeve, duke forcuar jo vetëm lidhjet institucionale, por edhe ato kulturore, ekonomike dhe arsimore,” tha ministri Hasani. Ai shtoi se kjo hapje është një sinjal i qartë për thellimin e bashkëpunimit rajonal dhe përmbushjen e aspiratave evropiane të Shqipërisë dhe Maqedonisë së Veriut.

Pas ceremonisë, ministrat Hasani dhe Mucunski zhvilluan një takim dypalësh, ku diskutuan për sfidat dhe mundësitë në procesin e integrimit evropian dhe bashkëpunimin rajonal në Europën Juglindore.

Me hapjen e kësaj konsullate, shqiptarët në Strugë dhe zonat përreth do të kenë më lehtësi në kryerjen e shërbimeve konsullore, duke sjellë më shumë afërsi dhe përfitime praktike për komunitetin shqiptar në rajon.