Një ngjarje e ndodhur në janar 2024, ku një skelë hekuri u rrëzua nga një pallat në ndërtim i firmës “Arlis Ndërtim” sh.p.k., ka çuar në dyert e gjykatës biznesmenin Armand Lilo. Imelda Shkëmbi, një prej të plagosurve, e cila po kalonte në trotuar në momentin e incidentit pranë Presidencës, ka ngritur padi ndaj kompanisë ndërtuese, duke kërkuar dëmshpërblim financiar në vlera të konsiderueshme, për dëmet fizike dhe psikologjike të shkaktuara.

Për këtë rast, gjyqtarja Ina Hoxhaj është caktuar për të shqyrtuar çështjen. Viktima rezulton të jetë bashkëshortja e trajnerit të Tiranës, Bledi Shkëmbi.

Incidenti çoi në arrestimin e tre personave të përfshirë në projektin ndërtimor – punëtorit Elton Osmanllari, sipërmarrësit Erjon Kanto dhe inxhinierit Zef Kalaj, të cilët më pas u liruan. Hetimet konkluduan se nuk ishin marrë masat e nevojshme të sigurisë në kantier, duke vënë në rrezik jetën e punëtorëve dhe kalimtarëve.