Pas disa muajsh në morg, trupi i Arben Lleshit, i cili u vra më 15 dhjetor 2023, është varrosur nga autoritetet vendore të Matit, pasi familjarët nuk shfaqën interes për ta marrë trupin. Prokuroria e Elbasanit ka konfirmuar se trupi është nxjerrë me autorizimin përkatës dhe është varrosur në një varrezë të zonës.

Lleshi u vra nga Sokol Mjacaj, një i dënuar përjetë që aktualisht është në regjimin e posaçëm 41 biss. Prokuroria ka verifikuar identitetin e të vrarit përmes gjurmëve të gishtave, duke konfirmuar se trupi i përkiste Arben Lleshit.

Familjarët kishin ngritur dyshime për identitetin e trupit, por pas verifikimeve zyrtare, ata nuk ishin të pranishëm për ta marrë trupin, ndoshta për shkak të frikës nga hakmarrja, pasi Lleshi ishte i dënuar për vrasje. Ekzekutimi i tij brenda burgut të Peqinit dyshohet të ketë qenë një akt hakmarrjeje, pasi një tjetër i burgosur, Indrit Shaqja, mbeti i plagosur aksidentalisht gjatë ngjarjes.