Zbardhen detaje të reja nga autoritetet spanjolle për zhdukjen misterioze dhe vrasjen e Miklovan Dakaj, një ngjarje që ka tronditur opinionin publik dhe ka hedhur dritë mbi përplasjet e forta të krimit të organizuar në Europë.

37-vjeçari shqiptar, i njohur me nofkën “Keli”, u gjet i pajetë më 1 shtator 2025 në Marbella, por hetimet tregojnë se ai ishte parë për herë të fundit që më 13 maj të po atij viti. Që në fillim, pista kryesore ishte rrëmbimi i lidhur me grupe kriminale aktive në jug të Spanja.

Trupi i tij u zbulua rastësisht pranë rezervuarit Casasola Reservoir, në zonën Almogía (Málaga), nga një shtetas polak që po bënte kamping. Mbetjet e viktimës ndodheshin në një çantë, çka përforcon dyshimet për një eliminim të organizuar.

Sipas hetimeve, ditën para zhdukjes, Dakaj kishte qenë në një restorant në Puerto Banús dhe më pas ishte nisur drejt zonës Puerto de la Torre, ku pritej të takonte persona që i kishin ofruar punë si truprojë. Pas këtij momenti, ai humbi çdo kontakt me familjarët.

Pak ditë më vonë, familja kishte marrë një mesazh kërcënues: “Miklovani është vrarë, mos e kërkoni”, duke ngritur dyshime të forta për një krim të paralajmëruar.

Hetimet kanë zbuluar gjithashtu se makina e tij, një BMW X6, u gjet e parkuar, ndërsa kamerat e sigurisë e filmuan teksa hipte në një automjet tjetër, një Peugeot 208 me qira, i cili dyshohet se u përdor nga autorët. Të dhënat e telefonisë celulare e vendosin këtë mjet në zonën ku më vonë u gjet trupi.

Edhe pse zyrtarisht nuk është konfirmuar një motiv, burime të ndryshme sugjerojnë se përfshirja e tij në aktivitete kriminale mund të ketë qenë shkaku i ekzekutimit.

Ngjarja vjen në një periudhë të rritjes së dhunës mes grupeve kriminale në jug të Spanja, ku trafiku i drogës, veçanërisht kokaina, po sjell përfitime të mëdha, por edhe përplasje të ashpra mes bandave.

Rasti i Miklovan Dakaj konfirmon një realitet gjithnjë e më shqetësues: konfliktet mes grupeve kriminale shqiptare dhe ndërkombëtare po zhvillohen në nivele të larta dhune në zemër të Europës.