Gjatë intervistës në “Big Brother VIP Radio” në Top Albania Radio, banorja Edisa ka rrëfyer momentet më personale brenda shtëpisë, duke prekur veçanërisht përplasjen me Nikolin.

E pyetur nga Rogerti lidhur me komentet për mëmësinë, ajo shpjegoi se kjo është një çështje shumë personale, që lidhet me pritshmëritë që kishte për jetën e saj. Edisa tregoi se kishte menduar se deri në moshën 30-vjeçare do të kishte krijuar familje dhe fëmijë, ndaj komenti i Nikolit e preku, duke e interpretuar si “të paplotësuar”.

“Unë kur kam qenë 23 vjeç kam menduar se deri në të 30-at e mija do të kisha 2-3 fëmijë. Më preku fakti se ai donte të më nxirrte si të paplotësuar, patjetër që e dua, por për një arsye apo një tjetër, nuk ka ndodhur”, u shpreh Edisa. Ajo shtoi se në çdo marrëdhënie ka dhënë maksimumin, dhe nëse nuk ka pasur një përfundim, e lidh me fatin.

Ndërsa për martesën, Edisa theksoi se nuk e konsideron si një institucion thelbësor, duke u shprehur e hapur për bashkëjetesë dhe krijimin e familjes pa nevojën e martesës: “Preferoj të jem e dashuruar gjatë gjithë jetës më shumë se sa martesën, është një dokument…”.