Unioni i Gazetarëve Shqiptarë ka reaguar sot pas incidentit gjatë konferencës për shtyp të kryeministrit Edi Rama, ku reporteres Ambrozia Meta i është ndaluar pjesëmarrja. UGSH e konsideron vendimin e kryeministrit një pengesë ndaj aksesit dhe lirisë për komunikim me median, duke theksuar se situata përsërit një model të përdorimit të tonit verbal për të shmangur përgjigje konkrete mbi çështje shqetësuese për vendin.

“Polemika verbale e kryeministrit me reporteren Meta zhvleftëson qëllimin e konferencës dhe shmang mundësinë për përgjigje konkrete. Masa përjashtuese shënon një rast të përsëritur të mospërmbajtjes së tij ndaj këmbënguljes për përgjigje specifike,” thuhet në njoftimin e UGSH.

Unioni i Gazetarëve u bën thirrje zyrtarëve të lartë politikë që konferencat për shtyp të mos shfrytëzohen si foltore për politizim dhe intimidim, ndërsa i apelon gazetarëve për solidaritet dhe respektim të parimeve etike. UGSH paralajmëron se sjellje të tilla shkaktojnë dëme serioze dhe stigmatizime politike, duke rrezikuar lirinë e medias dhe transparencën e informacionit për qytetarët.