Për herë të parë që prej hyrjes së ushtarëve koreanoveriorë në luftën mes Rusisë dhe Ukrainës, Ukraina ka njoftuar kapjen e dy prej tyre në rajonin e Kursk. Presidenti Volodimir Zelenski tha se ushtarët, të cilët ishin të plagosur, ishin dërguar në Kiev dhe po komunikonin me shërbimet e sigurisë ukrainase (SBU) përmes një përkthyesi. Ai shtoi se, si të gjithë të burgosurit e luftës, ushtarët koreanoveriorë po merrnin asistencën mjekësore të nevojshme dhe se gazetarët do të kishin mundësi të flisnin me ta.

Zelenski gjithashtu publikoi një video mesazh, ku tha se trupat koreanoveriorë ishin kapur nga forcat speciale ukrainase. Forcat speciale gjithashtu postuan një video që tregon ushtarët koreanoverior të kapur dhe në duar të autoriteteve ukrainase.

Ashtu si të gjithë të burgosurit e luftës edhe ushtarët koreanoveriorë po marrin të gjithë asistencën e nevojshme mjekësore”, tha Zelenski teka njoftoi se gazetarët do të kishin mundësi të flisnin me ta. “Bota duhet të di të vërtetën mbi atë që po ndodh’, shtoi ai.

Kievi pretendon se trupat e Phenianit janë duke luftuar në rajonin e Kursk, ku Ukraina ka nisur një inkursion që prej muajit gusht, duke mbajtur ende nën kontroll qindra kilometra katrorë në këtë zonë. Ukraina dhe aleatët e saj perëndimorë besojnë se Koreja e Veriut ka dërguar rreth 10,000 ushtarë për të luftuar krah ushtrisë ruse dhe ka kontribuar edhe me furnizimin me predha artilerie për ushtrinë e Putinit.