Parlamenti ukrainas ka miratuar një shtesë të madhe buxhetore prej 412 miliardë hryvnash (rreth 9.8 miliardë dollarë) për të forcuar kapacitetet ushtarake dhe për të përballuar presionin e luftës së zgjatur me Rusinë, që vijon prej më shumë se dy vitesh pa shenja përfundimi.

Sipas Ministrisë së Financave dhe ligjvënësve ukrainas, kjo shtesë e çon totalin e shpenzimeve të mbrojtjes për vitin 2025 në 2.2 trilionë hryvnia (rreth 53.2 miliardë dollarë), një rekord historik për vendin që nga nisja e agresionit rus në shkurt të vitit 2022.

Fondet shtesë do të përdoren për të mbuluar nevoja urgjente në fushën e armatimit, pajisjeve ushtarake dhe mbështetjes logjistike për forcat që ndodhen në vijën e parë të frontit, ku luftimet në lindje dhe jug të vendit po zhvillohen me intensitet të lartë.

Ky vendim vjen në një moment kur ndihma ndërkombëtare shpesh vonohet, duke e detyruar qeverinë ukrainase të kërkojë burime të reja të brendshme për të mbështetur përpjekjet mbrojtëse.

Shtesat buxhetore pritet të kalojnë edhe në leximin e dytë në parlament gjatë javëve të ardhshme për t’u bërë zyrtarisht pjesë e buxhetit të shtetit për vitin 2025.