Të tjera detaje dalin nga ulja e avionit privat mesditën e sotme në zonën e Vermoshit në Malësi të Madhe. Ky është një rast afërsisht i ngjashëm me atë të Divjakës disa vite më parë ku u rrëzua një avion me drogë.
Mësohet se brenda avionit kanë qenë dy persona të cilët kanë arritur të shpëtojnë. Menjëherë pas uljes, piloti tentoi të fluturojë sërish por nuk ia kanë dalë, ndaj u detyruan të largohen.
Disa banorë të zonës kanë tentuar të afrohen, por që ata nuk i kanë lejuar. Në vendngjarje ka mbërritur dhe një automjet tip “Fuoristradë” që i ka marrë dy personat dhe janë larguar.
Nuk dihet ende nëse ata janë turistë, apo ngjarja lidhet me situatën e trafikut të kanabisit në vend.
Njoftimi i policisë:
Më datë 04.10.2021, rreth orës 12:30, është marrë informacion se në zonën e Vermoshit, në kufirin ndarës ndërmjet Shqipërisë dhe Malit të Zi (vendi i papërcaktuar) është rrëzuar një avion i vogël.
Menjëherë janë nisur shërbimet nga DVP Shkodër dhe Komisariati i Policisë Malësi e Madhe, së bashku me Policinë Kufitare për verifikimin e rastit.
