Deputeti socialist Ulsi Manja reagoi sot nga foltorja e Kuvendit ndaj kërkesës së Partisë Demokratike për mocion me debat mbi njohjen e gjenocidit serb dhe ndaj akuzave të opozitës për qëndrimet e kryeministrit Edi Rama ndaj Kosovës.

Në fjalën e tij, Manja theksoi se Rama ka qenë gjithmonë një mbrojtës i fortë diplomatik i Kosovës, duke kërkuar në arenën ndërkombëtare njohjen e pavarësisë nga pesë vendet e BE-së që ende nuk e kanë bërë këtë hap.

“Do ju lutesha mos na fusni në ndjeshmëritë veri-jug, Kosova është pjesë e qenësishme e çdo shqiptari dhe çdo njeriu që ka gjak shqiptari.
Sa për Edi Ramën, ai s’ka nevojë për avokat, por në cilësinë si ish-ministër kam pasur fatin ta shoqëroj në disa vizita zyrtare në Evropë dhe e them publikisht se ai është avokat i shkëlqyer i çështjes së Kosovës.
Me qëndrime të forta diplomatike, në tryeza ku realisht bëhet politika evropiane e ndërkombëtare për Kosovën, ai ka kërkuar me forcë njohjen e pavarësisë së saj nga pesë vendet e BE që ende refuzojnë ta njohin”, deklaroi Manja.

Deputeti socialist shtoi se përfaqësuesit e mazhorancës do të marrin pjesë në protestën e nesërme në mbështetje të UÇK-së, por jo në cilësinë e politikanëve, por si qytetarë që nderojnë luftën për liri të Kosovës.

“Ju lutem, në protestën që do mbahet nesër, ne do shkojmë si qytetarë.
Hashim Thaçi, Kadri Veseli, Rexhep Selimi dhe Jakup Krasniqi janë komandantë të UÇK-së, dhe UÇK është faqja më e ndritur e luftës së Kosovës për pavarësi dhe liri”, përfundoi Manja.