Partia Demokratike ka paraqitur kërkesë zyrtare për ndryshime në përbërjen dhe funksionimin e Komisionit të Posaçëm për Reformën Zgjedhore dhe Komisionit të Posaçëm për Reformën Territoriale, duke kërkuar barazi përfaqësimi mes mazhorancës dhe opozitës.

Në dokumentin e paraqitur, demokratët i referohen traditës parlamentare dhe rëndësisë kombëtare që kanë këto dy reforma, të cilat, sipas tyre, duhet të garantohen nga një proces gjithëpërfshirës dhe i balancuar politikisht.

Për Reformën Zgjedhore, PD kërkon që komisioni të ketë 16 anëtarë, të ndarë si më poshtë:
• 8 anëtarë nga Partia Socialiste,
• 6 anëtarë nga Partia Demokratike,
• 1 përfaqësues nga grupi “Aleanca për Ndryshim”,
• 1 përfaqësues nga Partia e Lirisë.

I njëjti parim i ndarjes së përfaqësimit kërkohet të zbatohet edhe për Komisionin e Posaçëm për Reformën Territoriale.

Në propozimin e demokratëve theksohet gjithashtu rëndësia e përfshirjes së institucioneve ndërkombëtare me ekspertizë në fushën e qeverisjes dhe decentralizimit, si Kongresi i Autoriteteve Lokale dhe Rajonale i Këshillit të Europës.

Një tjetër pikë kyçe e kërkesës është që, në rast se palët politike nuk arrijnë konsensus për çështje të veçanta, ato t’i drejtohen Komisionit të Venecias dhe institucioneve të tjera përkatëse të Këshillit të Europës, në mënyrë që reformat të jenë në përputhje me standardet demokratike ndërkombëtare.

Ky qëndrim i PD-së vjen në një kohë kur debati për reformat zgjedhore dhe territoriale është rikthyer në qendër të axhendës politike, me synimin për t’u përmbyllur brenda këtij sesioni parlamentar.