Deputeti i Partisë Demokratike, Luçiano Boçi, ngriti sot në Kuvend shqetësime për gjendjen e universiteteve të rretheve, duke akuzuar qeverinë për braktisje dhe politikë diskriminuese ndaj arsimit të lartë jashtë kryeqytetit.

Boçi vuri në dukje se ndërkohë që universitetet rajonale po avancojnë, Universiteti i Shkodrës është lënë pas dore, duke u përballur me mungesë infrastrukture, programesh dhe mbështetje financiare:
“Shkodra është kryeqendra e veriut, por universiteti i saj nuk ka përfituar profilizim nga politikat tuaja. Sot ai ka vetëm një godinë të përfunduar, ndërsa pjesa tjetër e infrastrukturës është e amortizuar.”

Ai shtoi se pedagogët dhe drejtuesit akademikë nuk kanë marrë zgjidhje për kërkesat e tyre, ndërsa universiteti rrezikon të humbasë autoritetin, të mbyllë degë dhe të shohë zhdukjen e programeve universitare në veri:
“Sot ekziston një ndarje shumë e qartë midis Universitetit të Tiranës dhe universiteteve të rretheve, gjë që do të çojë në humbjen e autoritetit të tyre, mbylljen e shumë degëve dhe, pse jo, zhdukjen tragjike të këtyre universiteteve.”

Boçi përmendi gjithashtu problemet me ndërkombëtarizimin, rangimet globale dhe statusin e pedagogëve, duke theksuar se universitetet shqiptare renditen pas universiteteve në vende me të ardhura për frymë shumë më të ulëta: “Asnjë universitet shqiptar nuk renditet mes 1500 më të mirëve, ndërkohë që universitetet më të larta në rangim janë në Afrikë, si Sudani dhe Etiopia.”

Deklarata e tij solli një paralajmërim të qartë për pasojat e mosveprimit: mbyllje degësh, humbje autoriteti dhe dobësim të rolit rajonal të universiteteve të veriut.