Bruksel – Presidentja e Komisionit Evropian, Ursula von der Leyen, dha një mesazh të fuqishëm në lidhje me sfidat energjetike që po përballon kontinenti europian. Në një deklaratë të fundit, ajo nënvizoi domosdoshmërinë për të rritur investimet në rrjetet energjetike, ndërlidhjet dhe sistemet e magazinimit, si mjete kyçe për të përballuar kostot e larta që po rëndojnë mbi ekonomitë evropiane.

“Evropa po paguan një çmim të lartë për varësinë nga energjia, ndaj duhet të përshpejtojmë investimet në infrastrukturën që do na sigurojë energji të përballueshme dhe konkurruese,” tha von der Leyen.

Ajo ripërsëriti angazhimin ambicioz të Bashkimit Evropian për të hequr gradualisht importet e gazit dhe naftës nga Rusia deri në fund të vitit 2027, duke theksuar se “është koha të mbyllim rubinetin dhe t’i japim fund epokës së karburanteve fosile ruse në Evropë përgjithmonë.”

Ky mesazh vjen në një kohë kur çmimet e energjisë mbeten një nga shqetësimet kryesore për familjet dhe bizneset europiane, duke nënvizuar nevojën për një tranzicion energjetik më të shpejtë dhe më të qëndrueshëm në kontinent.