Parlamenti Evropian ka miratuar me shumicë votash përbërjen e re të Komisionit Evropian, i cili do të drejtohet edhe për një mandat tjetër pesëvjeçar nga Ursula von der Leyen. Në votimin e mbajtur të mërkurën, 370 eurodeputetë votuan pro, 282 ishin kundër, ndërsa 38 abstenuan.
Prioritetet e Komisionit të Ri
Gjatë fjalimit të saj para Parlamentit Evropian, Von der Leyen përsëriti angazhimet për një Evropë më të fortë dhe më të sigurt, duke theksuar:
•Investimet në mbrojtje dhe siguri, për të përballuar sfidat e reja globale.
•Reduktimin e ndotjes dhe luftën kundër ndryshimeve klimatike.
•Digjitalizimin dhe rritjen e konkurrencës ekonomike në skenën ndërkombëtare.
Ajo gjithashtu përforcoi përkushtimin e BE-së ndaj procesit të zgjerimit, duke theksuar se vendet kandidate si ato nga Ballkani Perëndimor, Ukraina, Moldavia dhe Gjeorgjia, “e kanë vendin në BE”. Komisionarja e zgjerimit, Marta Kos, dhe përfaqësuesja e lartë për politikën e jashtme, Kaja Kallas, do të jenë përgjegjëse për të avancuar këtë proces.
Përbërja Politike e Komisionit të Ri
Komisioni Evropian përbëhet nga 27 anëtarë, përfaqësues të shteteve anëtare dhe grupeve politike kryesore:
•Partia Popullore Evropiane (EPP) do të ketë 14 anëtarë, duke ruajtur statusin si grupi më i madh.
•Socialistët dhe Demokratët (S&D) do të kenë 4 anëtarë.
•Liberalët do të kenë 5 anëtarë, pavarësisht rënies së numrit të deputetëve në zgjedhjet e fundit.
•Dy komisionarë vijnë nga partitë e ekstremit të djathtë, ndërsa një, Marosh Shefçoviq nga Sllovakia, nuk i përket asnjë grupimi.
